عمرو سكر

انا قطة ونفسي ابقي كلب

2020-06-16
من زمان ومن ايام الفراعنة كان معروف ان القطة والكلب اكتر وجهين شائعين من اوجه الشخصية البشرية عموماً وعشان كدة اتقدسوا بشكل كبير، وعشان كدة تعرف تقسم بني آدمين كتير علي حسب هما قطط ولا كلاب. ..في الديانات القديمة وخصوصاً الهندية مقتنعين كمان ان القطط والكلاب بتترقي تبقي بني آدمين في حياتهم الاخري لما بتحبهم بتسميهم وبتديهم شخصية وبتطلعلهم صفات..لان الحب هو اللي بيرقي الروح... فا لو القط بتاعك كسلان واسمه محسن ..هيبقي في بني آدم بيتولد كسلان اسمه محسن وشخصيته قطة.
القطط علاقاتها love/hate
هتحبك طالما انت بتحبها ..اديها حب ومتطلبش منها حاجة الموضوع اجمالاً بمزاجها وانت لو شخصية ميالة للقطط فا انت غالباً كشخص عندك دايماً حاجات كتير تثبتها وبتحب تقدم قرابين حب في علاقاتك..لان القطط متطلبة وفعلاً بتحب خناقها او بمعني اخر بتحب تجر رجلك لحبها واول ما تحبها فا انت الخدام بتاعها. هتلعب بمزاجها هتحبك بمزاجها ملهاش هدف غير نفسها.
الكلاب عكس كدة الكلاب اصلاً بتشتغل بالشم وبتدي حب غير مشروط وحتي غير خاضع للزمن ..يعني بيولوجياً الكلب معندوش احساس بالزمن ووعيه غير مشروط ..عشان اشرحلك اكتر ..لو الكلب بتاعك سبته ٥ دقايق وجيت هيلعب معاك ويحبك ..ولو سبته شهر ورجعت هيلعب معاك ويحبك ..وعشان كدة بنشوف قصص عن كلاب راحت لقبور اصحابها واستنت علي شريط القطر.
فا الكلب حرفياً عايش في اللحظة ومقدر تماماً للنعمة اللي موجودة ولو هي مش موجودة فا هو مش دريان انها مش موجودة وبالتالي كل حاجة هدية لحظية لما بتيجي. من غير توقعات او احباط.
الكلب كمان سهل تديله هدف في الحياة في جيناته يعني ممكن يحرسك ويصطاد ويشم اللي انت عايزه ..لانه فعلاً الكود بتاع دماغه binary زي الالة الحاسبة ممكن تبرمجه بسهولة.
الكلب كمان بيلقط طاقة صاحبه لو صاحبه خايف الكلب هيخاف وهيحس بالتهديد فا هتلاقيه شرس مع الناس...لو صاحبه غاضب الكلب هيبقي غاضب. القطط برضه بتلقط الطاقة بس ساعات بتختار تراقب وتطنش بمزاجها.
الفراعنة كانوا بيعتقدوا ان القطة هي الروح المحاربة لاي انثي لان الستات فيهم شخصيات قططية اكتر...ذكاء ومفيش غشامة وبتحافظ علي حياتها ونضافتها ومشاعرها بكل الطرق. وعشان كدة خلوها الهة الحنان والوداعة والصيد والافتراس لان كمان في مجتمع السنوريات الانثي بتصطاد كمان وهي المسؤولة عن اي حوارات فيها عنف. وبالتالي احترموا كل الصفات الشخصية دي لدرجة التحنيط.
والكلب برضه خد نصيبه من التقديس بس في سياق انه الرفيق المخلص المحب لسيده ..ده غير انه بيعرف يروح العالم الاخر وبيشوف حاجات مش شايفينها ومش شامينها زيه ..فا تلاقي انوبيس اله العالم الاخر راسه راس كلب.
انا شخصياً قعدت وقت كتير شخصيتي قطة ..مذبذب بين الحب والكره ..عندي توقعات الناس تحبني ازاي ودايماً جايب ورا ومستني الدلع يجيلي لحد عندي ومؤخرا بس ادركت ان حياة الكلب مسلية اكتر ..كل يوم نعمة كل نعمة مفاجأة ومفيش حاجة متخطط لها ..
فكر كدة في اي شخص تعرفه هتحس انه شخصية من الاتنين يا قطة يا كلب ..يا منطوي وبمزاجه وكل يوم بحال ..يا كلب وعايش اللحظة ومتحمس لاي حاجة ومنطلق وبيلقط الطاقة في اي حتة.
وبصفة عامة حاول تعرف حيوانك الروحي ..اكتر حيوان بتحس انه شبهك واتسحل شوية في فكرة ان ده كان ممكن يبقي انت قبل ما تبقي نفسك...مش بالضرورة ان ده اللي حصل بس تخيل عشان التخيل ببلاش.
© 2020, Made with love