عمرو سكر

طبعاً اتحفنا برأيك

2020-06-14
في المواضيع المثيرة للجدل واللي بتقترب من ثوابت صعبة والناس بتتلخبط بلاحظ ناس كتير بتنصح العامة انهم مش لازم يتحفونا برأيهم والحقيقة ان ده اسوأ بكتيرمن ان الانسان يقول رأيه اللي يحتمل الصواب والخطأ
وخلوا بالكم من مغالطة مش لازم تقول رأيك دي انها بتوحي ان دايماً رأيك غلط والحقيقة ان الاراء مفيهاش صح وغلط اصلاً الاراء بتبقي وجهة نظر مبنية علي انحيازات شخصية + معلومات + حقائق
الانحياز الشخصي ..بتاعك يا معلم ..انا مبحبش الشيبسي
المعلومات ..انا ليا ابن خالي شغال في مصنع شيبسي وبيقولي ان الشيبسي بيتعمل بزيت وحش ...ممكن المعلومة تحتمل الخطأ والصواب لحد ما نتأكد منها ...
حقائق ...الشيبسي مش بطاطس الشيبسي كوسة ..هنا ممكن نقولك لأ ثانية دي حقيقة مش هنعرف نغيرها عشان خاطر حرية رأيك.
عرفنا الفرق بين التلاتة نرجع للزوم رأيك من عدمه ..رأيك مهم وانحيازك مهم ومعلوماتك لو اكيدة مهمة والحقايق هي الارض الصلبة اللي كلنا واقفين عليها. ليه مهم؟ لان ده بيقرب الصورة من عينيك. انا مش شايف اللي انت شايفه ولا مريت باللي انت مريت بيه وبالتالي عشان اعرف احكم لازم تقربلي الصورة.
علي سبيل المثال لا الحصر احنا اد ايه مش عارفين prespectives ووجهات نظر بعض ..ان الالوان مثلاً
اللي الناس بتفتكر ان مفيش اختلاف عليها ...
ممكن انا وانت نشوف فستان احمر ونقول عليه احمر بس الاحمر بتاعك هو الاخضر بتاعي وعمرنا ما هنعرف ..لو خدت عينيك بمعلومات مخي هقول عليه اخضر! ..انت متخيل اد ايه في مسلمات زي دي اصلاً مش مضمونة وبالتالي اد ايه اللغة عائق معظم الوقت؟؟
عادة الشخص اللي بيبقي عايز يقول للناس ان الرأي مش ملزم هو بس فقد الامل في انه يقنع الناس باللي شايفه والحقيقة ان مش مطالب منك توري الناس اللي انت شايفه
احنا بنحاول بس نقرب الصورة مش بنحاول نطابقها لان لو طابقناها يبقي احنا بنعمل وبنشوف وبنحس بنفس الحاجات بنفس الطريقة ويبقي تميز كل واحد فينا مش حقيقي .
الانسان جواه كل اللي بيخاف منه القمع والكبت واخراس المخالف لرأيك اللي كلنا مبنحبهوش هو حاجة طالعة من جوانا مش من برانا ..محدش بيجيله اوامر الهية انه يبقي شرير لكن الحقيقة ان بيتسحل جوة احباطه لدرجة تخليه مش حابب يسمع ولا يشوف اي حاجة غير اللي هو شايفها. غلطة كلاسيكية من احتكار الحقيقة وجهة النظر
عشان كدة طول الوقت مبحبش المثل بتاع ما اللي ايده في المية مش زي اللي ايده في النار...لان الرد السهل عليه هو ما هو اللي ايده في النار مش زي اللي ايده في المية برضه. لو انت اتولدت في بيئة صحية وصلتك للرأي الصحي الذكي من وجهة نظرك ده ازاي مش قادر تفهم حد اتولد في عكس ظروفك تماماً وشاف مجتمع مختلف عنك تماماً واتعرّض لعكس كل ما اتعرضتله سيادتك.
من حقك تحبط ان الناس مش بتشوف بعينيك بس مش من حقك تقولهم متشوفوش اصلاً .
وفي السياق العملي الكلام الكتير والنقاش الكتير قد يكون مرهق بس صدقني بيخلينا عارفين نفسنا واللي حوالينا اكتر وبالتالي نعرف نبقي مجتمع شفاف مفيهوش امراض مستخبية ..اصل فكر فيها الرأي اللي انت شايفه غبي ده تعرفه بمزاجك ولا يطلعلك فجأة في وسط الجد ؟
اعرف كل حاجة واسمع كل حاجة واتناقش وراقب وعلّم واتعلم..الرحلة مش انك تبقي متأكد من الوجهة لان الوجهة اصلاً بتتغير الرحلة انك تعوم في بحر الشك وتوصل لحاجة.
© 2020, Made with love