عمرو سكر

المحادثة السادسة

2020-06-18
المحادثة السادسة : ساعة
"كيف امسي الوقت متأخراً بهذه السرعة؟ " - دكتور سوس -
-هحكيلكم حاجة بسيطة تشرحلكم انا سبت الشغل ليه ..مرة كنت راكبة عربية مع خالد خطيبي ايام ما كنت مخطوبة وواقفين في اشارة ...جت بنت صغيرة وماسكة مناديل ..وقعدت تقولي "اشتري مني والنبي يا أبلة ..يارب تتجوزي البيه ..يارب تخلفوا ..يارب يكرمكوا" ..واشتريت منها مناديل فعلاً ..مع اني مش محتاجة مناديل ..البنت الصغيرة دي عملت كل حاجة ليها علاقة بشغلي ..واشطر مني كمان!
اصل لو فكرتوا فيها ..هي شغلانة الاعلانات دي ايه؟ ..اقناع الناس انهم محتاجين يشتروا حاجة مش محتاجينها ...بطريقة او بأخري ..الاعلانات هي شحاتة بس متصورة بطريقة شيك…
تخرج شروق سيجارة من علبة سجائرها في شنطتها وتشعلها ..يبدو علي اماني وثروت عدم الارتياح
-انتي بتشربي سجاير يا شروق؟
تساءلت أماني بينما زفرت شروق اول نفس من السيجارة واستطردت بدون اهتمام.
-عارفة ان ممكن تقولوا ان حرام اختزل الموضوع في بنت صغيرة بتشحت ..بس البنت عملت كل حاجة زي الكتاب..يمكن احسن من الكتاب.
تتوقف شروق عن الكلام حتي يتسني لها التربيت باصابعها علي السيجارة فوق منفضة السجائر البيضاء علي المائدة ، يستغل ثروت تلك الثوان في أكل بعض لقيمات الخبز من السلة الموضوعة بجانبه ، تنكزه أماني لكي يتوقف، تكمل شروق في شرود..
-البنت واقفة في اشارة زحمة في مصر الجديدة ..مختارة market كبير ..بتروح للعربيات الغالية ..عارفة الـtarget audience بتاعها..لما وقفت جنبي شافتني جنب شاب ..فا عرفت هتيجي تدعيلنا ازاي ..وازاي هتخليني افتح شنطتي اديها فلوس ..دعيتلي اتجوز واخلف…
تضحك شروق قليلاً ثم تستطرد
-ليه دعيتلي اتجوز واخلف؟ ..عشان هي بتشوف احتياجات الناس وبتلعب عليها ..see a need ...fill a need ...بس انا بصراحة في اللحظة دي محبتش فكرة انها افترضت احتياجاتي وقررت اسيب كل حاجة ...الشغل ..خطيبي ..نزلت من العربية اصلاً! ..
تضحك شروق وهي تطفئ السيجارة ..بينما يبتسم كل من اماني وثروت في توتر ..ترجع شروق كرسيها للوراء وتقوم في خفة.
-عن اذنكوا اروح التويليت..
تتحرك شروق باتجاه الحمام ويتكلم ثروت بعد ان يتأكد ان شروق ابتعدت بما فيه الكفاية.
-هي دي البنت الكويسة اللي تنفع ابن خالتي؟
-مش مناسبة ليه يعني؟
-دي هتزودله المرض ..انا اول مرة يجيلي اكتئاب وانا بتغدي؟ وانتي فاهمة الغدا معناه ايه بالنسبة لي
-وانت يعني ابن خالتك اللي متأخر ساعة ده هو اللي تاجر سعادة؟
-لأ ده قنبلة اكتئاب عشان كدة توقعت انك هتجيبيله واحدة فرفوشة تطلعه من اللي هو فيه ..
-والله انا مش متعهدة رقاصات عشان اجيبله واحدة تفرفشه ..دي بنت كويسة جداً ..واه متضايقة شوية ..معذورة ..كانت مخطوبة عن حب ..وسابوا بعض...ومن ساعتها وهي مقاطعة كل حاجة ..وسابت الشغل ..
-اه عرفت سابت الشغل عشان بنت غلبانة طلبت منها قرشين ..
يصمت الاثنان وتعود شروق الي مقعدها ويبدو عليها انها افضل قليلاً واكثر خفة ..يحاول ثروت كسر حدة الصمت المحرج المصاحب لجلوس شروق معهم.
-والله النهاردة شكله يوم جميل…
-طب ما تكلم آدم شوفه فين ..اتأخر اوي …
-هو آدم كدة ..مهمل …
تمر لحظات من الصمت قبل ان يقرر ثروت ان جعل تلك الجملة آخر جملة هو شئ مضر لجدوي اجتماعهم
-بس كويس يعني ..هو آدم كدة ..مهمل بس يتحب ...هتصل بيه ..
يقوم ثروت ليحدّث آدم علي هاتفه تنظر شروق لأماني في تحدي حائر وكأنها لا تعلم كيف تنظر لها
© 2020, Made with love