عمرو سكر

المحادثة الثالثة

2020-06-12
المحادثة الثالثة : دقيقة واحدة
"أضعت الوقت ..والآن الوقت يضيّعني" - وليم شكسبير -
-الو ..
-الو مساء الخير شركة network solutions ..آدم شكري مع حضرتك ..
-ايوة يابني ..حفيدي كان قاعد جنبي وبيقولي النت بايظ ..
-تمام يا فندم ..ممكن رقم التليفون الأرضي؟
-اتنين …
-تمام ..
-اربعة...لأ استني سبعة ...معلش يابني استني دقيقة اجيب الورقة اللي فيها الرقم …
-اتفضلي يا حاجة …
يخلع آدم السماعات ..وينظر لـ(صاوي) صديقه الواقف بجانبه وفي يده كوب قهوة
-المكالمة دي هتقعد اقل حاجة ٢٥ دقيقة ..
-بص للجانب المشرق ..٢٥ دقيقة ضايعين من يوم شغلك
-و٢٥ دقيقة من حياتي برضه ..
-ده جانب مشرق اكتر انا مكنتش شايفه كمان ..
تمر بجانبهم فتاة جميلة جداً ..لا ينتبه لها الاثنان
-انا عارف خطتك علي فكرة ..تعمل نفسك مش واخد بالك منها فا هي تاخد بالها انك ما بتبصش ..
-بس انا فعلاً مش عايز ابص يا صاوي ..
-حلو حلو ...اقنعني انا كمان بالخطة ..
-صدقني مفيش خطة ..انت بتديني اكبر من حجمي في موضوع التخطيط ده ..انا لو بعرف اخطط في حياتي ماكانش زماننا شغالين مع بعض
يرتدي آدم السماعات
-ايوة يا حاجة اتفضلي ….
-ملقيتش النمرة يابني ..انت محتاجها اوي؟
-لا خلاص ..حضرتك النت باين عندي انه واصلك ….فالمشكلة من عندك جربي كدة تشغلي الراوتر وتقفليه تاني؟
-يعني ايه راوتر؟ ..يا كيمو ...يعني ايه راوتر؟
-ممكن حضرتك تديني كيمو طيب؟..
-دقيقة واحدة اندهله …يا كيمو..
يخلع آدم السماعات
-ازاي مش عاجباك؟ دي من ساعة ما اتعينت معانا في الفلور وكل رجالة الفلور بيحاولوا معاها ...انت تعرف انها امبارح وطت تجيب حاجة وقعت منها عالأرض؟ ..واحنا في البريك كان ممكن تعرف ان ده الموضوع اللي بيتكلم فيه كل الناس.
-ايه القرف ده؟
-ما انت عشان مشوفتش …
-علي فكرة انا متأكد انها بني آدمة غبية وبتحاول تعوض ده بهدوم ضيقة ومكياج نقاشين ..
يلاحظ فجأة آدم وقوف الفتاة الجميلة بجانبهم ..صاوي ينظر لها وفمه نصف مفتوح
-انتي واقفة هنا من امتي؟
-احنا بنجمع فلوس عشان عم فرغلي الساعي مراته تعبانة لو حابين تشاركوا …
يخرج صاوي محفظته في توتر ويخرج كل النقود بها ..يحاول ان يخرج ورقة واحدة من فئة ٥٠ جنيه ..ولكن توتره يجعله يعطيها كل الأوراق النقدية بالمحفظة ..تبتسم له وتشكره علي كرمه ..ثم تنظر لآدم ...الذي يعطيها ٥٠ جنيه ..تشكره في امتعاض وتخرج ..
-يعني احراج وخمسين جنيه ...انا عايش في كابوس …
-هو انا ازاي عملت كدة؟ انا اديتها ٤٠٠ جنيه ..دي كل الفلوس اللي معايا دلوقتي..
-قولتلك هرموناتك هتأثر علي مرتبك في مرحلة ما ..
-آدم انت هتحاسبلي علي الأكل اللي انا طالبه ده خلاص قرب يوصل ..
-هديك ٥٠ جنيه …
-الاوردر اكتر من كدة طبعاً ..
-اللي طلع من ذمتي لست تعبانة ٥٠ جنيه ..اللي هيطلع من ذمتي لراجل جعان ومثار جنسياً ومش صاحبي اوي المفروض يبقي اقل اصلاً ..
يرتدي آدم السماعات
-الو ..
-الو يا عمو ..
-عمو؟
-انا كريييييم ..
-ماشي يا حبيبي ..بص ..
-كرييييييييييم….
-بص يا كريم واهدي...شايف الراوتر؟
-آه …
-في زرار ورا دوس عليه ..بعدين دوس عليه تاني ..المفروض اللمبة تطفي ..وبعدين تنور احمر ..بعدين تنور اخضر ..
-مفيش زرار ..مفيش زرار ..ها يا عمو؟
يخلع آدم السماعات
-انا لو فضلت اتكلم مع الواد ده صوته هيلزق في دماغي اسبوع ..
-مينفعش تقفل في وشه ..
يضع آدم السماعات
-في زرار يا حبيبي دور كويس..
-عمو استني دقيقة …
يخلع آدم السماعات ..ويضع يديه علي وجهه
-مينفعش موتسيكل ييجي يخبطني دلوقتي؟
-في الدور التالت؟ ...صحيح كنا ناويين النهاردة نعمل قعدة استميشن عالقهوة انا ومعتز و كريم مختار اللي في المبيعات ...ما تيجي؟
-انتوا كدة اربعة ممكن تلعبوا استميشن عادي عايز مني ايه؟
-لو حابب تيجي معانا يعني ..
-في اربع انواع من العزومات يا صاوي ..مراكبية و سد حنك ورد دين و شفقة ….اسوأ نوع هي عزومة الشفقة ..
-مش شفقة بصراحة هي مراكبية …
-لأ يبقي تمام عندي مشوار بليل ..
-مشوار ايه انا كنت فاكرك شغل وبيت ودكتور نفساني بس؟
-ابتديت اندم اني قولتلك ..مع اني قايلك من ربع ساعة ..الموضوع ده مش للهزار ..
-انا آسف انت عارف اني بهزر عشان معترفش اني محتاج اروح معاك …
-الحقيقة بقي ان عندي ديت ..
-مش مصدقك ..في حاجة ناقصة ..
-ابن خالتي وخطيبته مخرجيني مع واحدة متعرفش عني اي حاجة وانا معرفش عنها اي حاجة…
-كدة منطقي ..هي دي الحاجة الناقصة.
يرتدي آدم السماعات
© 2020, Made with love