عمرو سكر

المحادثة الثانية

2020-06-12
المحادثة الثانية : ساعتين
"الوقت الذي تستمتع بإضاعته ..ليس وقتاً ضائعاً" -marthe troly-curtin-
رجل سمين نسبياً يجلس علي كنبة ..امامه تورتة عيد ميلاد ..متبقي اكبر من ثلثها بقليل..يأكل منها ثم يرتشف من كوب شاي بلبن..بينما يدور مفتاح في باب الشقة ..ويدخل آدم …يصيح الرجل السمين بصيغة مرحّبة مزعجة.
-ابو آدم ! …
-ثروت؟
يقف الرجل السمين ويحتضن ادم الذي لا يبادله نفس الحرارة ..يستمر العناق لعدة ثوان محرجة ..
-ايه الفرصة السعيدة دي؟
-خالتي يا عم عازماني عالغدا ..اقولها لأ ..مش بيتي ده ولا لأ؟
تخرج سيدة خمسينية من المطبخ ..يبدو عليها الارهاق والحماس ..ترحب بآدم …
-كويس انك جيت يا آدم ..خلاص الرقاق خلص…
-الله يا خالتو ...الريحة طلعت …
-ازاي عارف تقول جملة تدي ايحاء انك جعان وانت بقك اصلاً بينقط كريمة ؟
-ايه يا عم آدم متهزرش في التخن..هيطلعلك في عيالك…
-مش هيطلع لي لو انت عمال تخلص الأكل ..وبعدين دي تورتة عيد ميلادي ..يعني من شهر خمسة ..ازاي مش بايظة؟
تجذب والدة آدم ابنها في منتصف جملته من ذراعه في اتجاه المطبخ..يدخلان معاً وتنظر لتتأكد ان ثروت منشغل بالطعام
-اسمع بقي ..ثروت ابن خالتك خد اجازة من الشركة مخصوص عشان ييجي يقعد معاك النهاردة ساعتين ...متحرجنيش ولا تحرج نفسك ..
-ماما ..انا مش غبي وانتي عارفة ..كلمتيه ليه؟
-عشان موضوع الدكتور النفساني اللي طلعتلي فيه امبارح ده …
-اه فا انتي كأم قولتي تعمليلي دكتور نفساني في البيت ...وكلمتي ابن خالتي ييجي يتكلم مع ابن خالته المعتوه صح؟
-وماله ابن خالتك؟ شريك في شركة كبيرة بمجهوده ..وخاطب وخلاص هيتجوز وعروسته قمر وبتعرف تطبخ..يا بخت أمه بيه..
-جميل اوي والله الكليشيه بتاع ابن خالتك ده اللي طلعلي علي كبر ...العيال عالنت يا ماما بيتريقوا على موضوع ابن خالتك ده…
-اهو ده اللي انت فالح فيه …
-وبغض النظر بقي ...ثروت ابن خالتي عارف صح اوي يبقي ترس في المكنة اللي هو فيها مش اكتر ..عشان كده هو مبسوط ومكمل في شغله ..ومراته دي اول واحدة مسك ايدها وعرقوا في صوابع بعض ..والجوازة دي كلها احساس بالذنب عالمرة دي…فا مش فاهم بصراحة! ..ايه مؤهله ده انه ييجي يتكلم معايا في اي حاجة؟ عالاقل انا معترف ان عندي مشكلة..
-يا سلام وايه مشكلتك بالظبط يا استاذ ادم اللي محتاجة رأي دكتور نفسي؟
-لا والله دي حاجة اسمها خصوصية بين الطبيب والمريض ..مش ناوي اخليها خصوصية بين الطبيب والمريض واللي خلفوه …
-يعني انت روحت برضه؟!!
-اه روحت …
-دفعت كام؟
-هو ده اللي هامّك؟
-اه عايزة اعرف دفّعك كام عشان يوهمك؟
-والله لو في حد هيوهمني ..فا انا افضّل الراجل اللي يوهمني يكون بياخد فلوس مش حتتين رقاق …
-عملت اللي في دماغك انت حر يا آدم..بس برضه هتقعد وتسمع وتتكلم ..استحمل الساعتين دول ..زي ما عرفت تستحمل الدكتور ..
نري ثروت جالس علي اول السفرة وخلفه ساعة حائط وهو يلتهم قطعة رقاق في نهم ..نري عينا آدم وهو يتابع العقرب وهو علي مشارف الساعة الخامسة ...يتمني آدم للحظة ان يدفع العقرب باصبعه فيدفع معه الزمن للأمام ..وان يتوقف صوت لعاب ثروت وهو يلتف حول قطع اللحم المفروم عن الدخول لاذنه ..يقاطع شرود ذهن آدم صوت حشرجة من والدته ..لتنبّه الجميع لما سوف تقوله.
-انا مش جعانة ..هروح اصلي كدة وابقي اكل بعدين ..
ينظر ثروت اليها منهمكاً في الأكل وبدون تركيز
© 2020, Made with love